ಗಂಗಾವತಿ ತಾಲೂಕಿನ ವೀರುಪಾಪುರಗಡ್ಡಿ ವಿದೇಶಿಗರ ಅಶ್ಲೀಲತೆಯ ಹೊಸ ವರ್ಷಾಚರಣೆಗೆ ಬ್ರೇಕ್!

ವಿದೇಶಿಗರ ಅಶ್ಲೀಲತೆಯ ಹೊಸ ವರ್ಷಾಚರಣೆಗೆ ಬ್ರೇಕ್!

ಕೊಪ್ಪಳ: ಗಂಗಾವತಿ ತಾಲೂಕಿನ ವೀರುಪಾಪುರಗಡ್ಡಿ ವಿದೇಶಿಗರ ಹಾಟ್​​ ಸ್ಪಾಟ್​. ಹೊಸ ವರ್ಷದ ಸಂದರ್ಭದಲ್ಲಿ ಇಲ್ಲಿ ನಡೆಯುವ ಅನಧಿಕೃತ ಚಟುವಟಿಕೆಗೆ ಬ್ರೇಕ್​ ಹಾಕಲು ಗಂಗಾವತಿ ಪೊಲೀಸರು ಮುಂದಾಗಿದ್ದಾರೆ.

ಹೊಸವರ್ಷಾಚರಣೆ ಸಂದರ್ಭಗಳಲ್ಲಿ ವೀರುಪಾಪುರ ಗಡ್ಡಿಯಲ್ಲಿರುವ ರೆಸಾರ್ಟ್​ ಮಾಲೀಕರು ವಿದೇಶಿಗರಿಂದ ಹೆಚ್ಚಿನ ಹಣ ಪಡೆದು ಅನಧಿಕೃತ ಚಟುವಟಿಕೆಗೆ ಅವಕಾಶ ಮಾಡಿಕೊಡುತ್ತಿದ್ದಾರೆ ಎಂಬ ಆರೋಪ ಕೇಳಿ ಬಂದಿತ್ತು.

ಅಸಭ್ಯವಾಗಿ ವರ್ತಿಸುವುದಷ್ಟೆ ಅಲ್ಲದೆ, ಮಾದಕ ವಸ್ತುಗಳ ಸೇವನೆ ಮಾಡುತ್ತಾ, ಅಶ್ಲೀಲ ಪಾರ್ಟಿಗಳನ್ನು ಮಾಡುತ್ತಾ ಈ ಪ್ರದೇಶದಲ್ಲಿ ವಿದೇಶಿಗರು ಅಸಹ್ಯಕರವಾದ ವಾತಾವರಣ ನಿರ್ಮಾಣ ಮಾಡುತ್ತಿದ್ದಾರೆ ಎನ್ನುವುದು ನಾಗರಿಕರ ದೂರಾಗಿತ್ತು.

ಈ ಹಿಂದೆ, ಈ ಭಾಗಗಳಲ್ಲಿ ಕಪಲ್‍ ಟೆಂಟ್​​ಗಳನ್ನು ಹಾಕಿಕೊಂಡು ವಿದೇಶಿಗರು ಅಸಭ್ಯವಾಗಿ ಹೊಸವರ್ಷ ಆಚರಿಸಿದ್ರು ಎಂದು ಸ್ಥಳೀಯರು ದೂರು ಸಲ್ಲಿಸಿದ್ದರು.

ಇನ್ನು ಕೆಲವೊಂದು ರೆಸಾರ್ಟ್ ಮಾಲೀಕರು ವಿದೇಶಿಗರ ಬಳಿ ದುಪ್ಪಟ್ಟು ಹಣ ಪಡೆದು ಮಾದಕವಸ್ತುಗಳನ್ನು ಪೂರೈಕೆ ಮಾಡುತ್ತಿದ್ದಾರೆ ಎನ್ನುವ ಆರೋಪವೂ ಇದೆ.

ಈ ಹಿನ್ನೆಲೆಯಲ್ಲಿ ಈ ವರ್ಷ ಪೊಲೀಸ್‍ ಇಲಾಖೆ ಎಚ್ಚೆತ್ತು ಕೊಂಡಿದ್ದು, ಯಾವುದೇ ಅಕ್ರಮ ಚಟುವಟಿಕೆ ಕಂಡು ಬಂದಲ್ಲಿ ಕಠಿಣ ಕ್ರಮ ಕೈಗೊಳ್ಳುವುದಾಗಿ ರೆಸಾರ್ಟ್‌ ಮಾಲೀಕರೆಲ್ಲಿರಿಗೂ ಖಡಕ್‍ ಸೂಚನೆ ನೀಡಿದೆ.

ರೆಸಾರ್ಟ್​ ಮಾಲೀಕರೊಂದಿಗೆ ಸಭೆ ನಡೆಸಿದ ಗಂಗಾವತಿಯ ಡಿವೈಎಸ್​​ಪಿ ಬಿಪಿ ಚಂದ್ರಶೇಖರ್​, ಕಾನೂನು ಮೀರಿ ನಡೆದುಕೊಂಡರೆ ಹಾಗೂ ಭಾರತೀಯ ಸಂಸ್ಕೃತಿಗೆ ದಕ್ಕೆಯಾಗುವ ರೀತಿ ಹೊಸವರ್ಷ ಆಚರಣೆ ಮಾಡಿದರೆ, ಪ್ರಕರಣ ದಾಖಲಿಸಿಕೊಂಡು ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಕೆ ನೀಡಿದ್ದಾರೆ.