ಏಕದಿನ ಪಂದ್ಯ, ವೆಸ್ಟ್​ ಇಂಡೀಸ್​ಗೆ ಭರ್ಜರಿ ಗೆಲುವು

ಏಕದಿನ ಪಂದ್ಯ, ವೆಸ್ಟ್​ ಇಂಡೀಸ್​ಗೆ ಭರ್ಜರಿ ಗೆಲುವು

ಇಂದು ನಡೆದ ಭಾರತದ ವಿರುದ್ಧದ ಏಕದಿನ ಪಂದ್ಯದಲ್ಲಿ ಪ್ರವಾಸಿ ತಂಡ ವೆಸ್ಟ್​ ಇಂಡಿಸ್ ಭರ್ಜರಿ ಜಯ ಗಳಿಸಿದೆ. ಭಾರತ ನೀಡಿದ್ದ 287ರನ್​ಗಳ ಗುರಿ ಬೆನ್ನಟ್ಟಿದ ವೆಸ್ಟ್​ ಇಂಡೀಸ್, ಎಸ್​​ ಡಿ ಹೋಪ್ ಹಾಗೂ ಎಸ್​ಒ ಹಿಡ್​ಮೇಯರ್ ಭರ್ಜರಿ ಶತಕಗಳ ಸಹಾಯದಿಂದ ಇನ್ನೂ 13 ಎಸೆತಗಳು ಬಾಕಿ ಇರುವಂತೆಯೇ ಕೇವಲ 2 ವಿಕೆಟ್​ ಕಳೆದುಕೊಂಡು 291ರನ್​ಗಳನ್ನು ಬಾರಿಸಿ ಭರ್ಜರಿ ಜಯ ದಾಖಲಿಸಿತು.

ಇನ್ನು ಮೊದಲು ಬ್ಯಾಟ್​ ಮಾಡಿದ್ದ ಟೀಂ ಇಂಡಿಯಾ 50 ಓವರ್​ಗಳಲ್ಲಿ 8 ವಿಕೆಟ್​ಗಳನ್ನು ಕಳೆದುಕೊಂಡು 287ರನ್​ಗಳನ್ನು ಗಳಿಸಿತ್ತು.

ಮೊದಲು ಬ್ಯಾಟ್​ ಮಾಡಿದ ಕೊಹ್ಲಿ ಪಡೆ, ಆರಂಭದಲ್ಲಿ ಕೆ.ಎಲ್​ ರಾಹುಲ್ (6), ಕ್ಯಾಪ್ಟನ್​ ವಿರಾಟ್​ ಕೊಹ್ಲಿ(4) ವಿಕೆಟ್​ಗಳನ್ನು ಆರಂಭದಲ್ಲೇ ಕಳೆದುಕೊಂಡರೂ ನಂತರ ಬ್ಯಾಟ್​ ಮಾಡಿದ ರೋಹಿತ್ ಶರ್ಮಾ (36), ಶ್ರೇಯಸ್​ ಅಯ್ಯರ್ (70), ರಿಷಭ್​ (71) ಪಂತ್, ಕೇದಾರ್ ಜಾಧವ್ (40)​, ರವೀಂದ್ರ ಜಡೇಜಾ (21)​ ಸಹಾಯದಿಂದ 287 ರನ್​​ ಗಳಿಸಲು ಶಕ್ತವಾಯಿತು.

ಇನ್ನು ವಿಂಡೀಸ್​ ಪರ 10 ಓವರ್​​ಗಳಲ್ಲಿ 3 ಮೇಡನ್​ ಸೇರಿದಂತೆ 46 ರನ್​ ನೀಡಿ 2 ವಿಕೆಟ್​ ಗಳಿಸಿದ ಕಾಟ್ರೆಲ್​ ಯಶಸ್ವೀ ಬೌಲರ್​ ಎನಿಸಿಕೊಂಡರು.

ನಂತರ ಬ್ಯಾಟಿಂಗ್ ಆರಂಭಿಸಿದ ವೆಸ್ಟ್​ ಇಂಡೀಸ್​ ಪ್ರಾರಂಭದಲ್ಲಿಯೇ ಆಯಂಬ್ರಿಸ್​ ವಿಕೆಟ್​ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಆದ್ರೆ ನಂತರ ಬಂದ ಹಿಟ್​ಮೇಯರ್ ವೇಗದ ಆಟ ಆಡುತ್ತ 106 ಎಸೆತಗಳಲ್ಲಿ 139ರನ್​ ಗಳಿಸಿ ಔಟ್​ ಆದರು. ಮೊಹಮ್ಮದ್ ಶಮಿ ಎಸೆತದಲ್ಲಿ ಶ್ರೇಯಸ್​ ಅಯ್ಯರ್​ಗೆ ಕ್ಯಾಚ್​ ನೀಡಿ ಹಿಟ್​ಮೇಯರ್ ಔಟ್ ಆದರು. ಇನ್ನೊಂದೆಡೆ ಪ್ರಾರಂಬದಿಂದಲೂ ನಿಧಾನಗತಿಯಲ್ಲಿ ಬ್ಯಾಟಿಂಗ್ ಮಾಡುತ್ತ ಬಂದ ಹೋಪ್​, 151 ಎಸೆತಗಳಲ್ಲಿ 102 ರನ್​ ಗಳಿಸಿ ನಾಟ್​ಔಟ್​ ಆಗಿ ಉಳಿದರು